Fréttir

Innritun er hafin fyrir börn sem eiga að fara í 1. bekk grunnskóla í Reykjanesbæ haustið 2021. Gert ráð fyrir því að foreldrar séu búnir að skrá börn sín fyrir 1. mars. Í Reykjanesbæ sækja nemendur grunnskóla samkvæmt skólahverfum. Foreldrar sækja um skólavist fyrir börn sín á íbúavefnum Mitt Reykjanes. Hér má skoða frekari upplýsingar um grunnskóla Reykjanesbæjar

Í dag var haldinn fyrsti viðburður á sal Stapaskóla og fyrsta upplestrarkeppnin. Nemendur úr 7. bekk eru búnir að æfa upplestur frá Degi íslenskrar tungu 16. nóvember sl. Í síðustu viku fór fram bekkjarkeppni þar sem allir nemendur í 7. bekk sem kjósa taka þátt í. Þeir lesa texta úr sögu og ljóð að eigin vali. Úr þeim hópi voru valdir sjö nemendur sem kepptu í dag í skólakeppni Stapaskóla. Þeir eru: Alma Rún, Guðmundur Atli, Júlíana, Katrín Alda, Kolbrún Dís, Viktor Breki og Viktoría. Það eru þær Katrín Alda og Júlíana sem fara fyrir hönd Stapaskóla og Kolbrún Dís sem verður til vara. Við óskum þeim til hamingju með upplesturinn og þátttendum fyrir frábæra frammistöðu. Dómarar í ár voru Brynhildur Sigurðardóttir kennari, Guðný Karlsdóttir aðstoðarskólastjóri Njarðvíkurskóla og Haraldur A. Einarsson grunnskólafulltrúi Reykjanesbæjar. Við þökkum þeim kærlega fyrir góð störf.

Ef þú átt barn á aldrinum 6 - 15 ára getur það átt rétt á sérstökum frístundarstyrk að upphæð kr.45.000

Miðvikudaginn 3. febrúar var haldinn stofnfundur foreldrafélag leikskólastigs. Helgi Arnarson fræðslustjóri var með erindi um sögu Stapaskóla og hversu mikilvægt foreldrasamstarf er í skólastarfi. Foreldrar fengu tækifæri á að spyrja út í skólastarfið og hagnýt atriði ásamt því að koma áhyggjum sínum um leikskólapláss til Helga og Ingibjargar leikskólafulltrúa.

Heimsókn og spjall við skólastjóra fór fram í öllum árgöngum á grunnskólastigi og elsta árgangs leikskólastigs sl vikur. Tilgangur með heimsókninni var að heyra þeirra hugmyndir og ábendingar um skólastarf. Einnig gafst nemendum færi á að spyrja að því sem þeim langaði til. Samtölin voru mjög góð, nemendur til fyrirmyndar og vel undirbúnir af kennurum sínum. Skólastjóri spurði einnig út í nokkur atriði er viðkemur skólastarfinu. Helstu spurningar nemenda voru: hvenær kemur sundlaug og íþróttahús? hvað ertu með í laun? hvenær er dótadagur? getum við fengið nöfn eða lása á munaskápa? getum við fengið billiard borð? getum við fengið ruslatunnu á leikskólalóð? borgaðir þú skólann sjálf? hvað kostaði skólinn? áttu hund eða kött? Mjög skemmtilegar spurningar og spjall sem skapaðist í kringum þær. Þetta er aðeins sýnishorn af þeim fjölmörgu spurningum sem komu. Skólastjóri spurði nemendur út í húsgögnin og upphaf skóladagsins. flest allir nemendur eru mjög ánægðir með að geta valið sér vinnuumhverfi við hæfi. Þeir segjast velja sér aðstöðu við hæfi eftir verkefnum. allir nemendur eru sáttir við að skóladagurinn þeirra á grunnskólastigi hefjist kl.8. 30 þó svo sumir vildu byrja enn seinna Við stefnum að því að gera þetta árlega og vonandi tvisvar yfir skólaárið til að taka stöðuna hjá nemendum og að eiga samtal um skólastarf því nemendur hafa ýmislegt fram að færa.

Dagur leikskólans er ár hvert þann 6. febrúar. Í ár ber þann dag upp á laugardegi. Stapaskóli mun halda upp á daginn föstudaginn 5. febrúar til að vekja athygli á mikilvægu hlutverki leikskóla og starfi leikskólakennara. Börn á leikskólastigi munu halda í skrúðgöngu stundvíslega kl. 9:00 um morguninn. Mikilvægt er að börnin séu mætt tímanlega. Þau munu ganga meðfram skólabyggingunni og enda í sal skólans í partýsöngstund með tónmenntakennara Stapaskóla ásamt 1. bekk. Börnin mega taka með sér vasaljós til að leika og ganga með. Það myndi alveg slá í gegn ef ljósin væru vel merkt. Eftir hádegið verða ýmsar skemmtilegar vísindatilraunir hjá eldri hópum með náttúrufræðikennara Stapaskóla

Undanfarin ár hafa FFGÍR, Foreldrafélög og foreldraráð grunnskólanna í Reykjanesbæ, boðið uppá fræðslu í grunnskólum Reykjanesbæjar í samstarfi við foreldrafélög skólanna. Þetta árið fengu þau til liðs við sig Ernu Kristínu, aktívista um jákvæða líkamsímynd og höfund bókarinnar Ég vel mig til þess að eiga samtal við. Í morgun kom Erna Kristín til okkur í skólann, spjallaði við krakkana í 1.- 4. bekk og sýndi þeim bókina sína. Bókin verður til á bókasafninu okkar í Stapaskóla hér eftir. Í bókinni reynir Erna að hjálpa krökkum við að byggja upp jákvæða sjálfs- og líkamsímynd barna og þannig kenna þeim að velja sjálfan sig og vera þakklát fyrir líkama sinn óháð útliti hans. Börnin stóðu sig ótrúlega vel í dag og við þökkum Ernu Kristínu innilega fyrir komuna.

Á miðvikudaginn kl.18.00 boðum við til stofnunar foreldrafélags leikskólastigs Stapaskóla. Við hvetjum foreldra/forráðamenn leikskólabarna að fjölmenna. Ásamt því að kjósa stjórn foreldrafélagsins verður kosið í foreldraráð. Helgi Arnarson fræðslustjóri verður með erindi um Stapaskóla og Ingbjörg Hilmarsdóttir leikskólafulltrúi verður á staðnum.

Fimmtudaginn 28. janúar er samtalsdagur á grunnskólastigi. Samtölin fara að mestu fram í fjarfundarbúnaði. Frístundaheimilið Stapaskjól er opið frá kl.8.00 - 16.15. Við minnum á að barnið á að vera með foreldri í samtalinu, annað hvort heima eða með kennara sínum ef barnið er í frístund. Sama dag er starfsdagur á leikskólastigi og leikskólinn lokaður.

Nú eru rúmar tvær vikur liðnar af nýju ári í nýrri reglugerð þar sem allir nemendur eru komnir í fullt skólastarf. Ný reglugerð gerði okkur kleift að sameina alla nemendahópa en þó með takmörkunum fyrir okkur út af tvenndunum. Nemendur okkar hafa staðið sig með eindæmum vel og eiga enn og aftur hrós skilið fyrir dugnað og aðlögunarhæfni. Við minnum samt áfram á það að þetta er ekki alveg búið og mikilvægt að huga vel að einstaklingsbundnum sóttvörnum. Einnig eru takmarkanir á því að foreldrar komi inn í skólabyggingu eins og var áður. Við höldum áfram með gleði, samvinnu, virðingu og vináttu að leiðarljósi í bjartari daga.